Manig hoher můt·
der tůt ſich aber vnder·
das vuͤgt des wint̾s zit·
wan ſin getwang·
Nv haben wir gewechſelt wol·
wir haben leit gegebin
vmb hohen můt·
vns te e· wint̾ ſoꝛgen vol·
nu mag man froͤlich· leben
den ſumer gůt·
man ſicht ſo mange ſchoͤne·
ſo hoͤꝛet man
der voglin ſuͤſſen doͤne·
ach ſolte ich gan
mit minem liebe wolgetan·
an ein heinliche gruͤne ...
So bꝛeche ich lǒb gras viol kle·
ich wolte ein bette machen·
vō ſchoner var·
die wang̾ ſtolz vō camandꝛe·
dc cult mang̾ ſachen·
vō blůmen ſchar·
ſo ſpꝛeche ich lieb nu ſchowe·
das bette fin·
vil mīnenklichú 378r frowe·
nu růche
dc mir z̾ge ſenlich̾ pin·
ich vúrchte das ſi ſpꝛeche des mag nicht ſin·
Doch wolte ich vmbeuahen ſi·
wer wolte mich des wenden
da wêr nieman
ſo wurde ich lichte ſoꝛgen fri·
ſin moͤchte mit linden henden
min nicht erſlan·
wir muͤſtin lichte ringen·
ſo ſolte ich wol
hin an dc bette ſi ſwingen·
ſo wurde es vol
der wunnen der ich wúnſchen ſol·
wan ich ir ſtêtes froͤmde ſo kume dol·