Nieman kan mit gerten·
kindes zuht beherten·
den man zeron bringen mag·
dem ist ein wort als ein slag·
Dem ist ein wort als ein slag·
dem man zeron bringen mag·
nieman kan beherten·
kindes zuht mit gerten·
Huͤtent úwerre zvngen·
Dc zimt wol dien ivngen·
stos den rigel fúr die tùr·
la denkein boͤse wort dar fúr·
la dekein boͤs wort dar fúr·
stos den rigel fúr die túr·
dc zimt wol dien ivngen·
hvͤtent úwer zvngen·
Hvͤtent úwere ǒgen·
offenbar vnd tǒgen·
lant si gv̊te sitte spehen·
vnd die boͤsen vber sehen·
vnd die boͤsen vber sehen
lant si gv̊te sitte spehen·
offenbar vnd tǒgen·
127v Hvͤtent wol der drÎer·
leider alze frÎer·
zvngen ǒgen oren sint·
dike schalchhaft zeren blint·
Dike schalchaft zeren blint·
zvngen ǒgen oren sint·
leider alze frier·
hvͤtent wol der drier·
Hvͤtent úwere oren·
oder ir sint tôren·
lant ir boͤsú wort dar in·
das gvneret iv den sin·
dc gvneret ú den sin·
lant ir boͤsú wort dar in·
alder ir sint toren·
huͤtent úwere oren·
Nieman riter wesen mag·
drîssec iar vnd einen tag·
im gebreste mv̊tes·
libes alder gv̊tes·
libes alder gv̊tes·
im gebreste mv̊tes·
drissec iar vnd einen tac·
nieman ritter wesen mag·