Nach des arn sitte ir ere·
hohe sweimet vnd ir mv̊t·
schande wenket von ir sere·
sam vor valken lerche tůt·
swer ir grůs nimt derst vor schanden
banden· vri sist selden wer·
Der wilde visch in dem bere·
nie genam so manigen wank·
als min herze in iamers lere·
nach ir dest min froͤide krank·
wan min vriheit sich vúr egen·
neigen· der vil lieben kan·
Swie der affe si gar wilde·
doch so vahet in sin schin·
sor in den spiegel siht sin bilde·
svs nimt mir dú frowe min·
sin lip herze mv̊t vnd ǒgen·
tǒgen· dest min vngewin·
Einen fúrsten hant bien·
swar der vert si volgent nach·
minen gedenken den vrien·
ist sus nach der lieben gach·
ir vil vroͤiden flúhtig lachen·
machen· kan wol froͤide mir·
Der einhúrn in megede schôse·
git dvr kúsche sinen lib·
dem wild ich mich wol genôse·
sit ein reine selig wib·
mich verderbet an den trúwen·
rúwen· mag si der gerich·