Mit sange wânde ich mine sorge krenken·
dar vmbe singe ich das ich si wolte lan·
so ich îe mere singe vnd ir ie bas gedenken·
so mvgent si mit sange leider niht zergan·
wan minne hat mich braht in solhen wan·
dem ich so liͤhte niht mac entwenken·
wan ich ime lange har gevolget han·
Sit das dú minne mich wolte alsust eren·
das si mich hies in dem herzen tragen·
dú mir wol mac min leit ze freuden keren·
ich wer ein gǒch wolt ich mich der entsagen·
ich wil minen kvmber ouch minne klagen·
wan dú mir kvnde das herze also verseren·
dú mac mir wol ze freuden huse geschragen·
Mich wndert wie mich min frowe twinge·
so sere swenne ich verre von ir bin·
so gedenke ich mir vnd ist min gedinge·
moͤhte ich si sehen min sorge wer da hin·
so ich bi ir bin des troͤst sich min sin·
vnd wenne des das mir wol gelinge·
alrerst meret sich min vngewin·
So ich bi ir bin min sorge ist dest mere·
als der sich nahe bútet zv̊ der glv̊t·
der brennet sich von rehte harte sere·
ir grossú guͤte mir das selbe tůt·
swenne ich bi ir bin das toͤdet mir den mv̊t·
vnd stirbe aber rehte swenne ich von ir kere·
wan mich das sehen dvnket also gv̊t·
IR schoͤnen lip han ich da vor erkennet·
er tůt mir als der vledramus das liet·
dú flúget dar an vntz si sich gar verbrennet·
ir groͤssú guͤte mich also verriet·
min tvmbes herze das en lie mich also niet·
ich en habe mich so verre an si verdennet·
das mir zeivngest reht alsam geschiet·