MIr tůt ein sorge we in minem mv̊te·
die ich hin hein zelieben frúnden han·
ob si da iender gedenken min ze gůte·
als ich ir hie mit trúwen han getan·
si solte mich dvr got geniessen lân·
dc ich ie bin gewesen in grosser hůte·
dc si iemer velsch kvnne an mir verstan·
Swer wenet dc min truren habe ein ende·
der enweis niht was mir an mime herzen lit·
ein kvmber den mir nieman kan erwenden·
es tête danne ir minneklicher lib·
die sorge han ich leider âne strit·
sine welle mir ir botten senden·
dem ich verwartet han vor menger zit·
Swie mir der [tot] vast vf dem ruggen were·
vnd dar zv̊ menig vngemach·
so wart min wille nie dc ich si verbere·
swie nahen ich den tot bi mir sach·
da menig man der sv́nden sin veriach·
do wc dc min almeistú swere·
dc mir genade nie von ir geschach·