Mir iſt von liebe vil leide geſchehē·
lies ichs darvmbe ſo w̾e ich zekranc·
dur dc ſende ich diſú lied̾ dur ſpehen·
an eine ſtat dar mich dc h̾ze twanc·
ſit ich ir leider niht wol 179r mac geſehen·
ſo ſol ſi merken dur got minen ſanc·
wil mir dú ſchoͤne d̾ warheit iehen·
ſo was ſi es nach der min h̾ze ranc·
vn̄ iemer mv̊s doch mir nie gelanc·
Mich hat dc h̾ze vn̄ ein vnwiſer rat·
ze verre v̾leitet an tvmplichē mv̊t·
da doch min dienſt vil kleine v̾uat·
d̾ kv̄ber hat mich vil dike gemvͤt·
mīne vil ſuͤſſe beginnunge hat·
vn̄ dvnket an dem anevange gv̊t·
da doch dc ende vil rúwic geſtat·
als es mir armē vil lihte getůt·
wie ſolt ich vō der not mich haben behvot·
Si darf des niht gedenken dc ich minen mv̊t·
iemer bekere an dehein ander wib·
des ſelbē han ich mich her wol behůt·
ſit ich ir gab beidiv h̾ze vn̄ lib·
vf ir genade ſwie we es mir tůt·
doch wil ich noch lang̾ haben den ſtrit·
ich hoffe des dc min reht iht ſi ſo gůt·
dc ſi mir ſchiere ein vil liebes ende git·
der groſſē ſwere ſo ſi des nv dvnket zit·