Mir iſt ein not voꝛ allem minē leide·
doh gegē diſem winter niht·
was darvmbe valwet gruͤne heide·
ſolher dinge vil geſchiht·
der ich aller mv̊s gedagen·
ich han me ze tůnne danne blv̊men klagē·
Swie vil ich geſage gv̊ter mêre·
ſo iſt nieman der mir ſage·
wēne ein ende werde miner ſwere·
da zv̊ maniger groſſē klage·
dú mir an das h̾ze gât·
wol bedoꝛfte ich wiſer lúte an minē rat·
Niender vinde ich trúwe daſt ein ende·
da ich ſi doch gedienet han·
guten lúten leit ich mine hende·
wolten ſi dar vffe gan·
des wer ich vil willig in·
owe dc mir niemā iſt als ich im bin·
Wol den ǒgen die ſo ſpehen kvndē·
vn dem h̾zen das mir riet·
an ein wib dú hat ſich vnderwunden·
gv̊ter dinge vn̄ anders niet·
ſwas ich dvrh ſi liden ſol·
daſt ein kvmb̾ den ich harte gerne dol·