Mir iſt alle zit als ich vliegende var·
ob al der w̾lte vn̄ dú min ellú ſi·
ſwar ich gedenke vil wol ſpꝛūge ich dar·
ſwie verre es iſt wil ich ſoſt es mir nahe bi·
ſtarc vn̄ ſnel beidú riche vn̄ fri·
iſt mir der mv̊t dvr dc lǒfe ich ſo balde·
mir enmac entrinnē dehein tier in dem walde·
dc iſt gar gelogen ich bin ſw̾e als ein bli·
Ich mac vō froͤiden toben ane ſtrit·
mir iſt vō mīne ſo liebe geſchehen·
ſwa w̾e ein walt beide lanc vn̄ wit·
mit ſchoͤnē bǒmē den wolte ich erſpehen·
da moͤhte man mich doh ſpꝛingende ſehen·
min reht iſt dc ich mich an froͤidē twinge·
wes lúge ich gǒch ine weis wc ich ſinge·
mir wart nie wirſ wil ich d̾ warheit iehen·
Ich mache den merkerē truͤbendē mv̊t·
ich han v̾dienet ir nit vn̄ ir has·
ſit dc min frowe iſt rich vn̄ gv̊t·
ê wc mir we nv iſt mir ſanfte vn̄ bas·
ein h̾zeleit des ich niene v̾gas·
dc han ich v̾laſſen vn̄ iſt gar v̾ſwūden·
min froͤide hat mich vō ſoꝛgē enbvndē·
mir wart nie bc· vn̄ lúge ich iv das·
Mir wil gelingē da mir nie gelanc·
an mīne der ſvͤſſen dc wil ich iv ſagen·
die merkere habent mēgen gedanc·
ſwēne ſi mich nv niht mere hoͤꝛent klagē·
dehein h̾ze ſer das tv̊t ſi mir v̾iagen·
[…]
des lon ir got dc min trurē hat ende·
dc iſt gar gelǒgē vn̄ iſt dar doch niht lanc·