Minne dú hat einē ſitte·
dc ſi den v̾miden wolde·
das gezeme ir bas·
da beſwêrt ſi manigē mitte·
den ſi niht beſweren ſolde·
we wie zimt ir dc·
ir ſint vier vn̄ zwenzec iar·
vil lieber dāne ir vierzeg ſin
vn̄ ſtellet ſich vil úbel ſihtz iender grawes har·
Minne wc min frowe ſo gar·
dc ich wol wiſte al ir tǒgen·
nv iſt mir ſo beſchehen·
kvmt ein ivnger ieze dar·
ſo wirde ich mit twerhen ǒgen·
ſchilhend an geſehen·
armes wib wes mv̊t ſi ſich·
weiſ got wan dc ſi liſte pfliget·
vn̄ toꝛen trúget ſi iſt doch elder vil danne ich·
Minne hat ſich an genomē·
dc ſi get mit toꝛen vmbe·
ſpꝛingent als ein kint·
war ſint al ir witze komen·
wes gedenket ſi vil tvmbe·
ſi iſt ioch gar zeblint·
dc ſi ir ruſchen niene lat·
vn̄ fuͤre als ein beſcheidē wib
ſi ſtoſſet ſich dc eſ mir an min h̾ze gat·
Minne ſol dc nemē fúr gv̊t·
vnd̾wilent ſo ſi ringet·
dc ich ſizen ge·
ich han alſo hohen mv̊t·
als einer der vil hohe ſpꝛīget·
we was wil ſis me·
anders diene ich ſwas ich mac·
ſi beſv̊che wa die ſehſe ſin
vō mir hat ſi in der wochen ie dē ſibenden tac·