Minen mv̊t·
hat dú minne· sere entzvnt·
als ein glůt·
ich enbrinne· zaller stvnt·
Vngewinne·
sint mir inne· worden kvnt·
kv́niginne·
mine sinne· tů gesunt·
hoher froͤiden fvnt·
sende in mines herzen grunt·
ich bin in den tot verwunt·
dc tet mir din roter mvnt·
Frowe min·
dv verkere· mine leit·
la mir sin·
froͤiden lere· vil bereit·
pris vnd ere·
dir vil here· si geseit·
iemer mere·
din lop sere werde breit·
sit din name treit·
hoher wibe werdekeit·
ane wandels gvnterfeit·
zieret dich der tvgende kleit·