Min frowe dú wil lonē mir·
d̾ ich ſo vil gedienet han·
des ſvlt ir alle danken ir·
ſi hat ſo wol zemir getan·
ſi wil dc ich ir wende dē rin·
dc er fúr kobelenze iht ge·
ſo wil ſi tv̊n dē willē mī·
mag ir bꝛingē vō dē ſe·
des grienes da dv́ ſv̄ne vf get·
zereſte ſo wil ſi mich wern·
ein ſterne da bi nahe ſtet·
deſ wil ſi vō mir niht enbern·
Ich han dē mv̊t·
ſwc ſi mir tůt·
dc ſol mich alles dunkē gv̊t·
ſi hat ſich wol an mir behůt dú reine·
268r ſvnd̾ got alleine·
ſo weis die frowē nieman die ich da meine·
Ich mv̊s dē manē ſinē ſchin·
benemē ſol ch ſi behabē·
ſo lonet mir dú frowe mī·
mag ich die w̾lt alvmbe grabē·
meht ich gefliegē als ein ſtar·
ſo tete dú liebe des ich ger·
vn̄ hohe ſweibē als ein ar·
vnde ich zemale tvſent ſper·
zertete als min her gamvret·
voꝛ Camvoleis mit richer ioſt·
ſo tete dú frowe mine bet·
ſvs mv̊ſ ich habē hohe koſt·
Ich han dē mv̊t·
ſwc ſi mir tůt·
dc ſol mich alles dunkē gv̊t·
ſi hat ſich wol an mir behůt dú reine·
ſvnd̾ got alleine·
ſo weis die frowē nieman die ich da meine·
Si giht mvge ich d̾ elbe ir flus·
benemē ſo tv̊ ſi mir wol·
dar zv̊ d̾ tv̊nowe irn dvs·
ir h̾ze iſt ganzer tvgēde vol·
dē ſalamād̾ mv̊ſ ich ir·
bꝛingē vs dē fúre her·
ſo wil dú liebe lonē mir·
vn̄ tv̊t ze mir des ich da ger·
mag ich dē regē vn̄ dē ſne·
erwendē des hoͤꝛe ich ſi iehē·
dar zv̊ dē ſvm̾ vn̄ dē kle·
ſo mag mir lieb vō ir geſchehē·
Ich han dē mv̊t·
ſwc ſi mir tůt·
dc ſol mich alles dunkē gv̊t·
ſi hat ſich wol an mir behůt dú reine·
ſvnd̾ got alleine·
ſo weis die frowē nieman die ich da meine·