Mich mvͤt dc so manger sprichet·
sor mich mv̊s in iamer schǒwen·
wer tet dir dis vngemach·
v́bel si sich an dir richet·
hast dv dc von diner vrowen·
der din mvnt iez beste sprach·
kan dú dine froͤide zern·
nv hast dv doh mannes bilde·
wie ist dir mannes mv̊t so wilde·
maht dv dich eins wibes niht erwern·
Wie moͤht ich mit der gestriten·
dú so gar gewaltekliche·
sitzet vf mins herzen turn·
der ist vest an allen siten·
so ist si schoͤne vnd eren riche·
wie gelebe ich einen sturn·
dc ich si getribe drabe·
ebenhoͤhe katzen mangen·
mvgent ir da niht erlangen·
la sin selbe tete selbe habe·
Si ist vf mines herzen veste·
gewaltig kúniginne·
dc sis eine haben wil·
si vertribet al die geste·
die dar labent mine sinne·
ǒch dvr kúrzewile spil·
mit ir zuht si fuͤgen kan·
dc min mv̊t so gar verasfet·
dc er anders niht enschaffet·
wan dc er si kapfet an·
Seite si mich zeinem male·
hein zů ir gedanke fúre·
sit si miner froͤiden pfliget·
solt ich da bi ir tv̊n twale
von der wunnebernden stúre·
hat sich sorgen angesiget·
keme ich in ir herzen kamer
ob si 113r dc mit willen hiesse·
da wont ich dc mih verstiesse·
niemer wankes zange noh sin hamer·
Ich kan wunder an der snuͤre·
ich kan vliegen vnd vliessen·
ich kan alle ritterschaft·
eigenlichen sterne ich ruͤre·
ich kan iagen birsen schiessen·
ich han wisheit vnd craft·
dis git wilde gedenken mir·
so min mv̊t als vmbe swinget·
vnd in mvͤde gar betwinget·
wil er růwen so mv̊s er hin zir·