Mich hilfet niht der vogel ſanc·
noch dú vil gruͤne heide·
mich twīget dc mich ê da twang·
vn̄ tůt mir aber leide·
den abent den moꝛgē·
den ſten ich mit ſoꝛgen·
voꝛ der vil mīnenklichē·
vn̄ nême ſi den dieneſt min ich wolde an froͤiden richen·
Ich ſolde wol in froͤiden ſin·
wolde es min liebú frǒwe·
ir mvnt iſt rot ir ǒgen ſchin·
die ich ſo ſeltē ſchowe·
ſi liebe ſi reine·
ſi troͤſtet mich kleine·
ſi wont mir in dem mv̊te·
ſwas ich ir gedienen kan ſi tv̊t mir niht zeguͤte·
Nv helfent mir die liebē bitten·
die mīnenklichen frǒwen·
dc ſi dur ir reinen ſitten·
min arbeit beſchowē·
den ſchaden den kvmber·
den ich vō ir tvmber·
lide ich bi minē iaren·
owe nv weis ich leider niht wie ich mich ſol gebaren·