Meie den gruͤnen walt·
hat bekleit·
gar mit siner guͤte·
dast wol schin·
zweie sich ivng vnd alt·
ane leit·
vs des bǒme bluͤte·
div vogellin·
singent sv̊ssen svmersank·
da bi siht man wunne me·
blv̊men rot gel vnd blanc·
dringent in tǒwe durh den gruͤnen kle·
Der meie machet· hohen mv̊t·
da bi truren swachet dú minne gůt·
Hoͤne der winter wc·
lieben kint·
nv siht man die heide·
geblvͤmet wol·
schoͤne lǒb vnd gras·
worden sint·
nieman sich mit leide·
nv binden sol·
wunneklicher varwe schin·
Hat dc velt an sich geleit·
swer mit zúhten froͤlich sin·
kvnne der si der lieben zuht gemeit·
Der meie machet· hohen mv̊t·
da bi truren swachet dú minne gůt·
Geilen sich werde man·
vnd wib·
minne ist ivngen lúten·
fúr truren gůt·
heilen ir helfe kan·
wunden lib·
herzekliches trúten·
sanfte tůt·
minne zwein gelieben git·
svͤssen wunneklichen rat·
so der walt gezieret lit·
inne mit lǒbe vnd er vil sanges hat·
Der meie machet· hohen mv̊t·
da bi truren swachet dú minne gůt·