Maria mv̊t̾ vn̄ meit der ſv́nd̾ troͤſt̾in·
all̾ heiligē frowe vn̄ in himel kúnigī·
din ſchoͤne git dē thꝛone glaſt·
alſo dc in din ſchoͤne vber ſchoͤnet·
da iſt froͤide ân ende vn̄ ân oꝛt dú niem̾ me zergat·
da got vn̄ ſin mv̊t̾ ſitzent ī ir maieſtat·
ich wolte g̾ne ſin ein gaſt·
da iegelich engel lob zelobe doͤnet·
ſant michahel d̾ ſinget vôꝛ
xp̄ēs lob dc es in dē thꝛone erhillet·
ſam tv̊nt engel in ir kôꝛ·
dc alles himelſches her ī dē froͤidē ſchillet·
da tvſent iar noch kvrzer ſīt dāne hie ein ſtúndelin·
die genade hant ſi vō gotte vn̄ dar zv̊ vō d̾ liebē mv̊ter ſin·
Got helfe mir dc minú kind̾ niem̾ w̾dē alt·
ſit dc es ī d̾ w̾lte iſt ſo iem̾lich geſtalt·
wie ſtet es vb̾ dꝛiſſeg iar
ſit mā die pfaffen ſiht ſo ſere ſtritē·
ſagt mir d̾ bâbſt vō rome· wc ſol ú der krvmbe ſtab·
dē got dem gv̊tē ſant peter vns zenbindē gab·
ſtol vn̄ infel gab er dar·
das er vnſ erloſte vō ſv́ndē zallē zitē·
nv ſin die ſtole woꝛden ſw̾t·
die vehtēt niht nach ſelē nv́wā nach golde·
wer hat úch biſchof dc geleret·
dc ir vnd̾ helme ritent da dú infel ſvͤnē ſolde·
úwer krūb̾ ſtab d̾ iſt gewahſē zeinē langē ſper·
die w̾lt habt ir betwūgē gar úwer mv̊t ſtet and̾s niht wā gib eht her·