Maniger wūne bilde·
geſchepfet hat·
meie mit der kúnfte ſin·
ſeht wie 385r dc gevilde·
gebluͤmet ſtat·
es git pfellelvarwen ſchin·
da bi bekleidet ſich der walt·
d̾ hat der lǒbe ein wūder·
ſvͤſſen ſanc darvnder·
vil manicvalt·
ſingent wol dv́ vogelin·
Svmer zit·
froͤide git·
vn̄ wūneklichē rat·
hei wc er nv froͤiden hat·
der liebe nahe lit·
Meie trurē krenket·
vf richē lon·
diēt im berg vn̄ tal·
vſ der bluͤte klenket·
vil ſvͤſſen don·
manic wilde nahtegal·
blawē viol gruͤnē kle·
die gelwē ziteloſen·
vn̄ rote roſē·
vil ſchone als e·
ſiht man ſpꝛingē vber al·
Sum̾ zit·
froͤide git·
vn̄ wūneklichē rat·
hei wc er nv froͤiden hat·
der liebe nahe lit·
Wol im der nv mīnet·
ein ſelic wib·
bi ſo maniger wūne gůt·
froͤidē vil gewīnet·
ſin w̾der lip·
liep nv wol dē herzen tůt·
ſwa dien ǒgen liehtē ſchin·
die blvͤndē bǒme bꝛīgent·
vn̄ den oꝛē ſingent·
dú vogellin·
da froͤit mīne māneſ mv̊t·
Svm̾ zit·
froͤide git·
vn̄ wūneklichē rat·
hei wc er nv froͤiden hat·
der liebe nahe lit·