Maniger fraget wc ich klage·
vnde giht des einen dc es iht von herzen ge·
der verlúset sine tage·
wand im wart von rehter liebe nie weder wol noh we·
des ist sin gelúke krank·
swer gedehte·
wc dv́ minne brehte·
der vertruͤge minen sank·
Minne ist ein gemeines wort·
vnd doch vngemeine mit den werken dest also·
minne ist aller tvgende ein hort·
ane minne wirdet niemer herze rehte vro·
sit ich den gelǒben han·
frǒwe minne·
froͤit ǒch mir die sinne·
mih mv̊t sol min trost zergan·
Min gedinge ist der ich bin·
holt mit reherten trúwen dassi ǒch mir dc selbe si·
trúget dar an mich min sin·
so ist minem wane leider lútzel froͤiden bi·
neina herre si ist so gv̊t·
swenne ir gvͤte·
erkennet min gemvͤte·
dc si mir dc beste tůt·
Wiste si den willen min·
liebes vnd gv̊tes des wurde ich von ir gewert·
wie moͤhte aber dc nv sin·
sit man valscher minne mit so svͤssen worten gert·
dc ein wib niht wissen mac·
wer si meine·
disú not alleine
tůt mir manigen sweren tac·
Der dv́ wib alrerst betrǒg·
der hat beide an mannen vnd an wiben missevarn·
in weis wc dú liebe tǒg·
sit sich frúnt gegen frúnde niht vor valsche kan bewarn·
frowe dc ir selig sit·
lant mit hvlden·
mich den grv̊s verschvlden·
der an frúndes herzen lit·