Manig herze sorget vf die zit·
die der winter bringet offenbar·
anger heide von im geselwet lit·
des waldes hoͤhe grise siht man gar·
dú kleinen vogellin sint ǒch geswigen·
des winters twingen tůt in we·
so fúrhte ich dc der lieben vngenade
welle an mir gesigen·
Mv̊s ich disen kvmber tragen
iemer vnz an minem tot·
wisse ich wem ich solde klagen·
min lange werenden not· des bedorft ich armer wol·
min frowe hat vergessen min·
in der dienste ich her vil manigen langen strengen kumber dol·
Gedinge hat mich darzv̊ braht·
dc ich mv̊s in grosser swere leben·
gen der lieben hat ich wol gedaht·
das si mir solte hohgemvͤte geben·
o we nu krenket si den minen mv̊t·
gebare ich sus gebare ich so·
so kan min herze erkennen niht·
was die lieben dvnke von mir gůt·