Manger hande blv̊t·
aber nv der meie hat·
da bi hab ich sorge manigvalt·
al min hoher mv̊t·
gar an einem wibe stat·
dv́ vil liebe hat min gar gewalt·
Genade frǒwe min·
tv̊ mir schiere helfe schin·
wende minen pin·
alder ich mvs verdorben sin·
Frǒwe gv̊t veriage·
mine senelichen not·
die ich in manigvalden sorgen han·
alle mine tage·
din vil suͤsses mv́ndel rot·
mag min herze vs allen sorgen lan·
Genade frǒwe min·
tv̊ mir schiere helfe schin·
wende minen pin·
alder ich mvs verdorben sin··
Miner froͤiden hort·
tv̊s dvr dine selikeit·
vnd enbinde minen senden lip·
sprich dc svͤsse wort·
ich wil wenden al din leit·
so bist iemer mer ein selig wib·
Genade frǒwe min·
tv̊ mir schiere helfe schin·
wende minen pin·
alder ich mvs verdorben sin··
Sit dc in ir bant·
si mich hat gebunden so·
dc ich mv̊s gar nach ir willen leben·
der mir ellú lant·
gebe ich wurde niemer fro·
wil si mir niht hohgemv̊te geben·
Genade frǒwe min·
tv̊ mir schiere helfe schin·
wende minen pin·
alder ich mvs verdorben sin··
Beschehe mir dc heil·
an der lieben frǒwe min·
dc mir wurde kunt ir schoner grůs·
vnd si spreche teil·
dar zv̊ si dc wellen din·
dir mag schiere sorgen werden bůs·
Genade frowe min·
tv̊ mir schiere helfe schin·
wende minen pin·
alder ich mvs verdorben sin··