Lâſſe ich minē dieneſt ſo·
dē ich nv lange her gevolget han·
ſo wirde ich niem̾ fro·
ſi mv̊s gewaltes me began·
danne an māne ie wib begie·
ê dc ich mich ſin gelǒbe ich kvnde doch geſagē wie·
Vs ir hvse vn̄ wider dꝛin·
bin ich berǒbet alles des ich han·
froͤide vn̄ alder ſinne min·
dc hat mir anders niemā wā ſi getan·
dc berede ich als ich ſol·
wil ſis lǒgen ſo getruwe ich minē rehte wol·
Ich bin ſo harte niht v̾zaget·
dc er mir ſo ſere ſolte dꝛǒn·
ich wart noch nie vō im geiaget·
er moͤhte ſichs ze mâſſe frǒn·
niemer wirde ich ane wer·
beſtat er mich in bedvnket min eines libeſ ein ganzeſ her·
Ich han ir vil menig iar·
gelebt vn̄ ſi mir ſelten einē tac·
da vō gewinne ich noch dc har·
dc man in wîſſer varwe ſehen mag·
ir gewaltes wirde ich grâ·
ſi moͤhte ſich ſin gelǒben vn̄ zvrnde anderſwar·
Wenet ſi dc ich den mv̊t·
vō ir geſcheide vmb alſo lihtē zoꝛn·
ob ſi mir ein leit getv̊t·
ſo bin ich doch vf anders niht geboꝛn·
wan das ich des troſtes lebe·
wie ich ir gediene vn̄ ſi mir ſware ein ende gebe·