Kvnde ich die mâsse
so liesse ich den strit·
der mich da mvͤget vnd lúzel vernahet·
der mich verleit
ze vaste in den nit·
swer sich vor liebe ze verre vergahet·
der wirt gebvnden·
von stvnden ze stunden·
als ich vil arme
nv erbarme
ich si niet·
dv́ mich nv lange also trurigen siet·
sit ich ir dienen begvnde·
als ich kunde·
Mir hat dc herze verraten den lip·
des wc ie flîssig der můt vnd die sinne·
dc si mich baten
ze verre vmb ein wib·
dú mir nv zeiget dc leit fúr ir minne·
dast an mir gar ein wunder
besvnder
dc ich mich han verlan·
ze verre vf den wan·
der mich ie trǒg·
vnd mir freislichen lǒg·
sit ich ir dienen begvnde·
als ich kvnde·