Kan min frowe svͤsse svren·
wenet si dc ich gebe lieb vmbe leit·
sol ich si dar vmbe tvren·
dc si es wider kere gar an min vnwerdekeit·
so kvnde ich vnrehte spehen·
we wc sprich ich orenloser ǒgen ane·
den dú minne bliendet wie mac der gesehen·
Saget mir ieman wc ist minne·
so west ich gerne ǒch darvmbe me·
swer sich rehte nv versinne·
der berihte rehte mich wie tůt si we·
minne ist minne tůt si wol·
tůt si we sone heisset si niht minne
svs enweis ich wie si danne heissen sol·
Ob ich rehte raten kvnne·
was dú minne si so sprechent ia·
minne ist zweier herzen wunne·
teilent si geliche so ist dú minne da·
sol aber vngeteilet sin·
so enkan si ein herze aleine niht enthalden
owe woldest dv mir helfen frowe min·
Frowe ich eine trage ein teil zeswere·
wellest dv mir helfen so hilf an der zit·
si aber ich dir gar vnmere·
dc sprich endeliche so lâsse ich den strit·
vnd wirde ein ledic man·
dv solt aber eines wissen dc dich rehte
lútzel ieman bas danne ich geloben kan·