Ir vil minneklichen ǒgen blike·
ruͤrent mich al hie swanne ich si sihe·
in min herze owe sold ich si dike·
sehen der ich mich vúr eigen gihe·
eigelichen dien ich ir·
dc sol si vil wol gelǒben mir·
Ich trage in minem herzen eine swen·
der ich von mir lassen niht enmag·
bi der ich vil gerne tǒgen were·
beide naht vnd ǒch der liehten tag·
des enmag nv niht gesin·
es enwelle dú liebe vrowe min·
Sol ich miner trúwe alsvst engelten·
so ensol niemer man getruwen ir·
si vertruͤge michels bc ein schelten·
danne ein loben das gelǒbent mir·
we war vmbe tůt si dc·
der min herze treit vil kleinen has·