IR svlt sprechen willekomen·
der mere bringet dc bin ich·
alles dc ir habent vernomen·
dast gar ein wint nv fragent mich·
ich wil miete·
vnd wirt min lon icht gůt·
ich sage lihte dc iv sanfte tůt·
sehet wc man mir eren biete·
Ich wil tútschen frowen sagen·
solhú mere dc si deste bas·
alder werlte svln behagen·
ane grosse miete tůn ich dc·
ze richeme 133v lone·
sint si mir zehere·
so bin ich gefuͤge vnd bitte si nihtes mere·
wan dc si mih gruͤssen schone·
Tútsche man sint wol gezogen·
als engel sint dú wib getan·
swer si schildet der ist betrǒgen·
ich enkan sin anders niht verstan·
tvgent vnd reine minne·
swer die sv̊chen wil·
der sol komen in vnser lant da ist wunne vil·
lange mvͤsse ich leben dar inne·
Ich han lande vil gesehen·
vnd nam der beten gerne war·
úbel mvͤsse mir geschehen·
kvnde ich ie min herze bringen dar·
dc ime wolde wol gevallen·
froͤmder sitte·
was hulfe mich ob ich vnrehte stritte·
tútschú zv̊ht gat vor in allen·
Von der elbe vnz an den rin·
vnd wider vnz in vngerlant·
so mvgen wol die besten sin·
die ich in der werlte han bekant·
kan ich schǒwen·
gv̊t gelêsse vnd den lib·
sem mir got so swuͤre ich wol dc da dú wib·
besser sint danne anderswa die frowen·
Der ich vil gedienet han·
vnd iemer gerne dienen wil·
dú ist von mir vil vnerlan·
ie doch so tůt si leides mir so vil·
si kan seren·
mir dc herze vnd den mv̊t·
nv vergebes ir got dc si an mir misse tůt·
her nach mac si sichs bekeren·