IR mvnt der lúhtet als der liehte rubin tv̊t·
wan er hat sich geivnget als der fenix in dem fúre·
er ist noch heisser danne ein sinder von der glv̊t·
vnd eitet als eins traken kel sin lachen ist gehúre·
er geneistet als ein fúr stein snel·
wan solt min mvnt sin zvnder sin bis es die minne enpfienge·
er brinnet als ein vakel hel·
vnd get vf als ein roͤselin wie wol es mir ergienge·
da drehet vs ein balsem der des hat gewalt·
der widerivnget vnd wirt ǒch niemer alt·
swem si wont mit rehten trúwen steteklichen bi·
dem wahset niemer grawes har vnd wirt ǒch aller sorgen fri·