IN den ſvm̾lichē tagē hohe ſtat·
manig h̾ze niht dc min·
dc klage ich d̾ ſchoͤnē dú mir ſeltē lat·
keine froͤide komē darin·
ſol daſ iemer alſo ſin·
ſo mag ich wol klagē dc an ir niht zergat·
ir vil mīneklich̾ ſchin·
SJ gelichet wol dē ſt̾nē tremvndan·
d̾ nie hin noch her gegie·
als hat ſi lange wid̾ mich getan·
dc ſi ir mv̊t v̾keret nie·
ſit ich mich an ſi v̾lie·
ſo enkvnde ich an ir vindē noh entſtan·
wan v̾ſagē das vant ich ie·
Si ſol wiſſen ſwas ich leides vō ir klage·
dc ich doch nie wib geſach·
die ich ſo mīnekliche ī mime h̾zē trage·
nie niht and̾s ich v̾iach·
dvlde ich da vō vngemach·
wc dar vmbe ich moͤhte noh gelebē die tage·
dc nie lieb̾ mir geſchach·