ICh wirbe vmbe alles das ein man·
ze werltlichen froͤiden iemer haben sol·
dc ist ein wib der ich enkan·
nach ir vil grossem werde niht gesprechen wol·
lob ich si so man ander frǒwen tůt·
dc genimt si niemer tac von mir vergůt·
doch swer ich des sist an der stat·
da si vs wiplichen tugenden 100r nie fůs getrat·
da ist dú mat·
Als eteswenne mir der lip·
dvr sin boͤse vnstete ratit dc ich var·
vnd mir gefrúnde ein ander wib·
so wil iedoh das herze niender wan dar·
wol im des dc es so rehte weln kan·
vnd mir der svͤssen arbeit gan·
doch han ich mir ein lieb erkorn·
dem ich ze dienste vnd were es al der werlte zorn·
wil sin geborn·
Vnde ist dc mirs min selde gan·
das ich ab ir wol redendem mvnde ein kússen mac versteln·
git got dc ich es bringe dan·
so wil ichs tǒgenlichen tragen vnd iemer heln·
vnd ist dc sis fúr grôsse swere hat·
vnd vêhet mich dvr mine missetat·
was tv̊n ich danne vnselic man·
da nim eht ichs vnd trages hin wider da ichs da nan·
als ich wol kan·
Si ist mir lieb vnd dvnket mich·
wie ich ir volleklich gar vnmere si·
wc darvmbe dc lide ich·
ich was ir ie mit steteklichen trúwen bi·
vnd was ob lihte ein wunder an mir beschiht·
dc si mich eteswenne gerne siht·
sa denne lâsse ich ane has·
swer giht dc ime an frowen si gelvngen bas·
der habe ime das·
Dú iar dú ich noch ze lebenne han·
swie vil der were ir wurde· niemer tag genomen·
so gar bin ich ir vndertan·
dc ich vnsanfte vs ir genaden mohte komen·
ich froͤwe mich des dc ich ir dienen sol·
si gelônet mir mit lihten dingen wol·
gelǒbe eht mir swenne ich ir sage·
die not die ich an dem herzen trage·
dike in dem tage·