Ich wil wol vō wibes gvͤte·
iem̾ ſpꝛechē vn̄ ſingē·
dur ſi dú mir hohgemvͤte·
mag voꝛ allen frowen bꝛingē·
ſi iſt eine
die ich meine·
voꝛ in allē·
wol gevallē·
mv̊ſ ſi mir·
ſeht darvmbe diene ich ir·
Ich ergab mich eigēliche·
ir do ich ſi ſen begūde·
dc hat ſi dú ſeldēriche·
gar vnm̾e ſit d̾ ſtvnde·
dc ſi gv̊te
minē mv̊te·
ſw̾e merte·
do v̾ſerte·
ſi mich gar·
des nimt ſi nv kleine var·
Wiſſe ich wie ich mich gebarte·
da vō ſi min ahte neme·
vn̄ ich niend̾ deſ envarte·
dc ir erē miſſezeme·
d̾ gedinge·
machet ringe·
mich vō ſoꝛgē·
froͤiden boꝛgē·
wolde ich dan·
des ſi leider mir erban·
Minne tůt vnmīnekliche·
mir an ir die ich da mīne·
ſi betwīget vngeliche·
mī vn̄ der vil gv̊tē ſinne·
daſt ein ſw̾e·
dú mih lere·
froͤidē machet·
vn̄ ſwachet·
mir dē lib·
dc bedenke ein ſelig wib·