ICh wil von der minneklichen·
minneklichú mêre sagen·
ir pris kan so hohe strichen·
vnd vnpris so gar veriagen·
sost ir schoͤne als vs gesvndert·
swer si siht dc den des wundert·
wie sis eine mvge getragen·
Schoͤne an libe vnd ǒch an mv̊te·
des dú meiste volge ie iach·
ist dv́ minnekliche gůte·
missewende von ir sprach·
dc ir teil da niht enwere·
dc wer ir von herzen swere·
wans ir selten me beschach·
IN ir herzen selde entspringet·
dú der werlte vroͤide git·
svͤz ir helles lob erklinget·
irdesch wunsch gar an ir lit·
kvnden vogel rehte schowen·
so lobtent sie si ze frowen·
fúr die liehten svmer zit·