Ich wil min gemvͤte eriettē·
dc niht ſoꝛgē dꝛinne ſi·
trut geſpil nv hilf mir trettē·
nv ſint doch gedanke vꝛi·
dc die niemā vb̾windet·
ich han fvnden mir ein ſpil·
d̾ mir minē ving̾ bindet·
ſo wúnſch ich doch ſwc ich wil·
Des ſolt dv mich niht erlazen·
ſo wil ich dir mere ſagē·
al min trurē ware v̾waſſē·
moͤht ich einē mā v̾iagē·
ſih d̾ wil mich froͤide noͤtē·
vn̄ doch ſoꝛge nit erlan·
io mvͤſ er mich niunſtvnt toͤten·
e ich wurde im vnd̾tan·
Liebe dē ſolt dv mir zeigē·
lihte vinde ich einē liſt·
dc wir in mit zuht geſweigē·
ald dē rat der beſſer iſt·
var vurder betwūgē mīne·
vꝛie liebe gar v̾holn·
dú erflǒget vns die ſinne·
ſwez iſt dc da wirt v̾ſtoln·
Swer mit leide wil ertwingē·
liebe der toͤꝛet ſich vil gar·
lieb liebe leit leidē erringē·
kan ich wil ze froͤidē ſchar·
ſelde vn̄ ir geſinde waltir·
die mit froͤiden ſin gemeit·
froͤlich ivgēt blvͤgent alter·
git vn̄ ander w̾dekeit·
Wol zimt allen gv̊tē lútē·
tvgenthafter hoher mv̊t·
herzelieb mit wunſchen trútē·
dc iſt vúr vngemvͤte gv̊t·
niemā kan mich des erwendē·
d̾ mir tǒgenlich iſt holt·
dē wil ich min h̾ze ſenden·
dc ſi ſiner mīne ſolt·