Ich wil aber ſingē·
ein liet hin zeſtúre dien kindē·
dc ſú mitte enpfahen dē meien·
tanzē vn̄ ſpꝛīgen·
ir megede wol vf zv̊ d̾ lindē·
da ſvn wir mit hādē vns zweien·
hie ein tſchabel doꝛt ein krenzel vf ir hǒbet·
da hat vns d̾ meie ſinē kran erlǒbet·
zeſv̊chē· ſwc wir ſin̾ varwe gerůchen·
Nv froͤit ſich dú heide·
d̾ walt vogell mit ir ſtīme·
nahtegal dú liebe in der owe·
noch lebe ich mit leide·
d̾ iam̾ mich twinget mit grīme·
dc mich niht engruͤſſet min frowe·
leit mit liebe ī minē h̾zē iſt gemiſchet·
da vō mir d̾ lib ī froͤidē dike erliſchet·
ich tvmb̾·
ſol mich niht v̾uahē min kvmber·
Stvͤnde ī min̾ hende·
dc riche ſi truͤge die krone·
dc ſi ir armē frúnt icht v̾ſmahen·
ſw̾ ſi deſ wende·
dc ſi mir nah dienſte niht lone·
d̾ mvͤſſe alle ſin ſelde v̾gahen·
nit wc ie da voꝛ ſo hvͤtē ſich die beſtē·
das die valſchē vō ir nide niht gar zerbꝛeſtē·
dc meine·
mag ich vō ir ſcheidē noh neine·
Iſt ir h̾ze erſteinet·
ſo trúget ir lachē mih ſere·
da bi kan ſi ſchone gebarē·
ich bin d̾ ſi meinet·
mit trúwē mirs niemā v̾kere·
ſit vō minē kintlichē iarē·
mag ſi dvr ir gvͤte mich vō ſoꝛgē bꝛīgen·
ich mv̊z vb̾hǒbet dike vnſanfte ringē·
ī ſoꝛgen·
wil ſi ſo iſt min truren v̾boꝛgē·