ICh was voꝛ ir·
das ich wol min iamer ir geklaget ſolde han·
min ſendú gir·
wart ſo gros das ſi mich dar nit reden wolde· lan·
wan ſi was ſo rechte wunnenklich getan·
das ich nicht mochte voꝛ liebe in minen ſinnen beſtan·
wan ſwēne ein man·
wirt ze rechte fro·
ſon enweiſ er noch inkan·
recht alſo·
irgieng mir ſenden leider voꝛ ir do·
Das h̾ze min·
wart ſo rechte muͤde vō gidanken in der ſtūt·
e ſender pin
mich gar vberſtritte da was froͤide mir wol kunt·
ſendú noch gieng mir zeherzen in den grunt·
do dachte ich owe lieblich geſtellet ſo roter mūt·
do ward ich wunt·
vō ſendem iamer gros·
mich bant der minne bunt·
minne ſchos·
mich dc ich minen ſin ſo gar v̾loſ·
Owe dc ich·
ir nit machte giklagin· min vil langes vngemach·
ir wunne mich·
tet ſo gar v̾zagen· wan ich ſi ſo ſchoͤne ſach·
ich dachte mir ſo rechte nahe ſenlich ach·
da mir ſo gar min ſpꝛache· in minem herzen do bꝛach·
ich wart ſo ſwach·
vō ir wunnen fin·
das ich dachte
h̾ze lach
froͤide din·
das wart ǒch leid̾ mir do balde ſchin·