Ich ſroͤwe mich gen dem Meijen nichteſ nicht·
in getrurt ǒch nie gen des wint̾s zit·
ſol aber mich erfroͤwen ichtes icht·
das ſol tůn ein wib an der min froͤide lit·
ſol ich truren das kumt vō ir ſchulden·
ſênfter wolt ich dulden·
den tot ê· ich enber ir hulden·
Si ſpꝛichet vil ſi ſi min frúnt gar gůt·
vn̄ wil doch nicht tůn das min herze gert·
wa bi ſol frúnt erkennen frúndes můt·
frúnt ſol ſin gen frúnde das er werde gewert·
vrǒwe biſt dú min frúnt das la ſchin·
werden liebe min·
ſpꝛich ia ſo lebe ich ſunder pin·
Wan ſeit das in himilriche ſi froͤiden vil·
ſwes den man lúſte dv́ froͤide ſi im na·
durch iren willen ich dar komen wil·
wirt ſi mir nicht hie ſecht ſo wirt ſi mir da·
moͤcht aber mir ir hulde werden·
ich belibe vf der erden·
al hie got lies ich doꝛt die werden·