Ich bin ſo rehte vꝛo·
das ich vil ſchiere wnder tv̊n beginne·
ſwenne es ſich gefuͤget ſo·
das ich erwirbe miner frǒwen minne·
ſo ſtigent mir die ſinne·
hoher dāne der ſvnnen ſchin· gnade ein kv́neginne·
Ich enſach die gv̊ten nie·
ſo dike das ich das verbere·
mirn ſpilten dv ǒgen iê·
der kalte winter was mir gar zeſwêre·
ander lúte dvhte er gůt·
mir was die wile als ich enmitten in dem meijen were·
Diſen wnneklichen ſanc·
han ich geſvngen miner liebē frǒwē ze eren·
des ſol ſi mir wiſſen danc·
wan ich wil iemer dvrch ſi froͤide meren·
wol mag ſi min herze ſeren·
was danne ob ſi dv́ beidv́ tv̊t· das kan ſi wol verkeren·
Dar zů enkvnde niemā mir·
geraten das ich ſchiede von dem wâne·
kert ich minen mv̊t von ir·
wâ fvnde ich ein ſo ſchoͤne wip
dv́ were valſches âne·
ſi iſt ſchoͤner vn̄ bas gelobt denne helêne vn̄ dv́ane·
Hoͤꝛa walther wie es mir ſtat·
min trvt geſelle von der vogelweide·
helfe ſůche ich vn̄ rat·
dv́ wol getane tůt mir vil zeleide·
kvnden wir geſingen beide·
das ich mit dir mvͤſte bꝛechen blůmen an der liehten heide·