Ich bin gebundē·
zallē ſtundē·
als ein man·
der enkan·
niht gebarē nach dem willē ſin·
dc mag ſi gebuͤſſen· dú mich twinget·
dc min mvnt ſinget·
manigē ſw̾en tag·
wan ich enmac
niht geruowē ich enkome ir nahe bi·
ſo dc ich ir ſagen muͤſſe· waſ min wille ſi·
dc eine mac mir ſoꝛge wendē·
ſi kan mit leide âne van vn̄ mit froͤidē enden·
Ich wil v̾ſv̊chen·
ob ſi gerůchē·
welle dc ich ſinne·
nach ir mīne·
langer danne ich han getan· enpfahet ſis zegv̊te·
ſo ſtiget min froͤide gegen der wūneklicher zit·
vn̄ wirt mir ſo wol zemv̊te·
dc es wūder were·
ob min h̾ze dc v̾b̾e·
dc es vō froͤide niht zv̊ den himeln enſpꝛvnge·
vn̄ vō ſo ſuͤſſer handelvnge·
ein hohes núweſ liet in ſvͤſſer wiſe ſvnge·
Als ich ſihe dc beſte wib·
wie kvme ich dc v̾bir·
dc ich niht vmbevahe ir reinē lib
vn̄ twingē ſi zemir·
ich ſtan dike zeſpꝛunge als ich welle dar·
ſo ſi mir ſo ſv̊ſſe voꝛ geſtêt·
nême ſin ellú w̾lt war·
ſo mich der mīnende vnſin an get
ich moͤhte ſin niht v̾lan·
der ſpꝛung wurde getan·
truwet ich bi ir einer hvlde durh diſen vnſin beſtan·