Iarlang bloͤzet ſich d̾ walt·
vn̄ ǒch dú heide·
valwet vō dē kaldē ſne·
wie hant ſich div zit geſtalt
owe d̾ leide·
ſchowēt wie d̾ anger ſte·
zergangē iſt d̾ gruͤne kle·
wil dú reine
die ich da meine·
min v̾geſſen ſo wirt mir vil dike we·
Min frúnde helfent mir·
d̾ liebē dankē·
d̾ ich ſingē vf hohē pꝛis
gůtē troſt han ich vō ir·
mehte ich d̾ blankē·
machē bꝛvn ir rotē gris·
ſi gert des apfels dē paris·
gab dur mīne
der gúttinne·
fuͤge ich dc ſo mag ich heiſſen ir amis·
Swas ich wil dc iſt ir nein·
mv̊s ich dc lidē·
ê· wie lange ſol dc w̾n·
alſvs hellen wir enein·
koͤnde ich gemidē·
ſi dc wolde ich fuͤgē g̾n·
ſi wil vō mir dē liehtē ſt̾n
tremvntanē·
vn̄ dē manē·
zv̊ d̾ ſvnne· des en wil ſi niht enbern·