Herzeklicher froͤide wart mir nie so not·
mir enteten sorgen tǒgenlichen we·
die mv̊ssen sin an mir vil vnuerwandelot·
in gelebe dc si genade an mir bege·
so mvͤst ich wol truren iemer lan·
vnd liesse manige rede als ich niht horte fúr dú oren gan·
Was vnmasse ist dc ob ich des han gesworn·
dc si mir lieber si danne ellú wib·
an dem eide wirt niemer har verlorn·
darvmbe setze ich ir ze pfande minen lip·
swie so si gebútet also wil ich leben·
sin gesach min ǒge nie dú bas ein hohgemvͤte koͤnde geben·
Ungefuͤger schimpf bestet mich alle tage·
si iehent des dc ich ze vil gerede von ir
vnd dú liebe si ein luge die ich von ir gesage·
owe wan lassent si den schaden mir·
si moͤhten tv̊n als ich da han getan·
vnd heten wert ir lieb vnd liessen mine frowen gan·