Heide ist aber worden schoͤne·
si hat manger hande varwe kleit·
die vogel singent suͤsse doͤne·
swie dú svmerwunne ist vil gemeit·
da bi dulde ich sendú leit·
swie der meie vogellin froͤne·
ich han not von liebe vnd arbeit·
Wild vnd zam dc froͤit sich sere·
gegen des wunnklichen meien zit ·
dannoch froͤit sich michels mere·
swer bi herze liebe tǒgen lit·
ahý was dem froͤide git·
werder reiner wibe lere·
machet mannes vngemv̊te wit·
Wol gemv̊ten gv̊ten wiben·
wúnsche ich heiles svnder nît·
si kvnnen vngemvͤte vertriben·
we wc wunne an wiben lit·
wibes minne froͤide git·
got fuͤge iemer húbschen liben
ane swere minneklichú zit·
Manger giht in mvͤsse blangen·
nach den froͤiden die man wilent vant·
derst mit sorgen vmbevangen·
wurde aber im von wibe ein lieb erkant·
besser froͤide er nie bevant·
froͤide ist noch so niht zergangen·
wib geben froͤide als ie vber ellú lant·