Got herre ân anegenge vnd ǒch an ende almehtig got·
dv iemer froͤide gebender dinen lieben heiligen sabaoth·
lop si dir hohem gotte gesagt· vs al den sinnen min·
der vnzallichen eren vnd ǒch der hohen werdekeit·
die dv vs aller diner kraft mit voller wirde hast geleit·
vf die gelopten reinen magt· die edeln mv̊ter din·
al diner wisheit wunder werk dv hast volle braht an ir·
mit aller diner almehtekeit· nah aller diner gir·
dv hast si so erhoͤhet herre vber alle himel vnd erde wit·
dc si dir selbe froͤide vnd allen dinen lieben git·