Got gebe ir iemer gv̊ten tag
vnd laze mich noch gesehen·
die ich minne vnd nit erwerben mag·
mich mvͤt das ich si hoͤre iehen·
wie holt si mir entrúwen wêre·
vnd sagt mir ein ander mêre·
des min herze inneklichen kvmber lidet iemer sit
ǒwe wie suͤze ein arbeit·
ich han ein senftevnseftekeit·
Ich were dike gerne vrô·
wan das ich nit gesellen han·
nv si alle truren so·
wie mohte ich eine denne lan·
ch enmvͤze ir vinger zeigen liden·
ich enwolte froͤide dvrch si nit miden·
svs behabe ich wol ir hvlde· das sis laze ane nîd
wand ich gelache niemer niht·
da es ir dekeiner siht·
Got vil wol ze mir getan·
sit ich mit sorgen minnen sol·
das ich mich vnderwnden han·
dem alle lúte sprechent wol·
im wart von mir in allen gahen·
ein kv́ssen vnd ein vmbevahen·
so schos mir in min herze das mir iemer nahe lît
vnz ich getv̊n des er mich bat·
ich tetes wrde mirs dv́ stat·
Es tv̊t mir inneklichen wê·
als ich gedenke wes man phlag·
in der werlte wilent· ê·
ǒwe das ich nit vergessen mag·
wie rehte vro die lúte waren·
do kvnde ein selig man gebaren·
vnd spilte im sin herze gegen der wnneklichen zît·
sol das iemer mer geschehen·
so mvͤt mich das ichs han gesehen·
Sit das ich eigenlichen sol·
die wile ich lebe ir sin vndertân·
vnd si mir mag wol· gebvͤzzen
den kvmber den ich dvrch si han·
geliten vnd iemer also liden mv̊s·
das mich enmag getroͤsten nieman si entv̊s·
so sol si nieman den dienest min·
vnd bewar dar vnder mich·
das si sich an mir ǒch versvme sich niht·