Genade frowe alſo beſcheidenliche·
la mich dir einer iemer lebē·
ob ich daſ bꝛeche dc ich furder ſtriche·
wā eineſ ſolt dv mir v̾geben·
dc maht dv mir zekurzer wile erlǒben g̾ne·
die wile vnz ich din beiten ſol·
ich nennes niht dv weiſt es wol·
ich ſage dir wes ich angeſt han da fúrht ich dc ich es wider lerne·
Gewunne ich iemer lieb dc wil ich haben eine·
min frúnt der mīnet andꝛú wib·
an allen gv̊tē dingē han ih wol gemeine·
wan da man teilet frúndeſ 135v lib·
ſo ich in vnderwilent g̾ne bi mir ſehe·
ſo iſt er vō mir anderſwa·
ſit er da gerne ſi ſo ſi ǒch da·
es tůt ſo manigē wibe we dc mir da vō niht wol geſchehe·
Si ſelic wib ſi zúrnet wider mich ze ſere·
dc ich frúnde an manige ſtat·
ſi gehies mich nie geleben nach ir ere·
ſwie iamerlich ich ſi es bat·
was hilfet mich dc ich ſi mīne voꝛ in allen·
ſi ſwiget iem̾ als ich klage·
wil ſi danne dc ich anderē wibē wider ſage·
ſo laſſe ir mine rede ein wenic bas gevallen·
Ich wil dir iehen dc dv mich dike ſere bete·
vn̄ nam ich des vil kleine war·
do wiſſe ich wol dc dv allenthalbē alſo tete·
da von wart ich dir ſo froͤmde gar·
der min ze frúnde ger wil er mich gewinnen·
d̾ laſſe alle ſolhe vnſtetekeit·
gemeine lieb dc dvnket mich gemeines leit·
nv ſage weiſt dv anders iht da vō getar ich dich niht gemīnē·