Frowe lânt úch niht verdriessen·
miner rede ob si gefuͤge si·
moͤht ichs wider úch geniessen·
so wer ich dien besten gerne bi·
wissent dc ir schoͤne sint·
hant Ir als ich mich verwene·
gvͤte bi der wolgetene·
wc danne an iv einer eren lit·
Ich wil iv ze redenne gvnnen·
sprechent swas ir went ob ich niht tobe·
dc hant ir mir an gewunnen·
mit dem úwerm minneklichem lobe·
in weis ob ich schoͤne bin·
gerne hete ich wibes gvͤte·
lerent mich wie ich die behuͤte·
schoner lip der tǒg niht ane sin·
Frowe dc wil ich iv leren·
wie ein wib der welte leben sol·
gůte lúte sult ir eren·
minneklich an sehen vnd gruͤssen wol·
eime svlt ir úwern lip·
geben fúr eigen vmb den sinen·
frowe woltent ir den minen·
den gebe ich vmb ein so schoͤne wib·
Beide an schǒwen vnd an gruͤssen·
swa ich mich daran versumet han·
dc wil ich vil gerne bvͤssen·
ir hant hovelich an mir getan·
tv̊nt dvrh minen willen me·
sit niht wan min redegeselle·
in weis nieman dem ich welle·
nemen den lip es tete ime lihte we·
Frowe lant mich es also wagen·
ich bin dike komen vs grosser not·
vnd lant es úch niht betragen·
stirbe aber ich so bin ich sanfte tot·
herre ich wil noch langer leben·
lihte ist iv der lip vnmere·
wc bedorfte ich solher swere·
solt ich minen lip vmb úwern geben·