Es wer vns allen·
einer hande selden not·
dc man rehter froͤide schone pflege als ê·
ein missevallen·
dc ist miner froͤiden tot·
dc dien ivnge froͤide tv̊t so rehte we·
war zv̊ sol ir ivnger lip·
da mit si froͤide solten minnen·
hei wolten si ze froͤiden sinnen·
ivnge man des hvlfen noh div wib·
Nv bin ich ê doch·
fro vnd mv̊s bi froͤiden sin·
dvrh die lieben swie er dar vnder mir ergat·
min schin ist hie noch·
so ist bi ir dc herze min·
dc man mih ofte sinne losen hat·
hie solten si zesamene komen·
min lip min herze ir beider sinne·
dc si des wol wurden inne·
die mir dike froͤide hant benomen·
Vor den merkeren·
kan nv niemanne lieb geschehen·
wan ir hv̊te twinget manigen werden lib·
dc mv̊s besweren
mich swenne ich si solte sehen·
so mv̊s ich si miden si vil selig wib·
doch mvͤsse ich noch die zit geleben·
dc ich si willig eine vinde·
so das dv́ hv̊te vns beiden swinde·
da mitte wurde mir liebes vil gegeben·
Vil maniger vraget·
mich der lieben wer si si·
der ich diene vnd alles her gedienet han·
so des betraget·
mich so spriche ich ir sint dri·
dien ich diene so hab ich zv̊ der vierden wan·
doch weis sis alleine wol·
dú mich hat svs zv̊ zir geteilet·
dú gv̊te wundet vnd heilet·
der ich vor in allen dienen sol·
Nv frowe minne·
kvm si minneklichen in·
dv́ mich twinget vnd also betwungen hat·
bring si des inne·
dc werdú minne twingen kan·
was ob minneklichú liebe ǒch si bestat·
so moͤhte si ǒch gelouben mir·
dc ich si gar von herzen meine·
nv minne bewere irs vnd bescheine·
dc ich iemer gerne diene dir·