Es meiet húre aber als ê·
von dem tǒwe
sprach ein frowe·
springent blv̊men vnd kle·
dú nahtegal singet vf der linden·
ir svͤssen sanc·
merze von dem reien spranc·
bi dem solt dv mich vinden·
Tohter wende dinen mv̊t·
von dem tǒwe·
ganc her schǒwe·
disú mere sint niht gv̊t·
warn dich gegen dem scherpfen winder·
ahte niht vf merzen sin
des rede dring hin hinder·
Vnde reie also swies dir erge·
ob er dich triege·
das ein wiege·
vor an dinem fůsse iht ste·
sich so wirt din froͤide harte kleine·
vnd mag geschehen·
so dv die blv̊men wellest sehen·
dc nach dir iht weine·
Mv̊ter ir sorget vmbe den wint·
mirst vnmere·
solhe swere·
wib dú trůgen ie dú kint·
ich wil miner froͤide niht enlâssen·
durh úwern rat·
reiche mir min liehte wat·
dú wiege var verwassen·
Nv hoͤrent wie es ir ergie·
si biegen beide·
da mit leide·
dú mv̊ter einen rechen vie·
den begreif dú tohter bi der groͤsse·
si nam in der alten vs der hant
do gient es an die stoͤsse·
Si stiessen beide ein ander wol·
dú alte sprach
dis vngemach·
nam ich vernt von dir niht ver vol·
nv bin ich leider kranc an minem libe·
gebest dv merzen tvsent marc
er neme din niht zewibe·