Es iſt reht dc ich laſſe dē mv̊t·
d̾ mir vf mīne ie wc riche vn̄ gůt·
ich wil gebarē als es nu ſtat·
owe das mīne ie dc boͤſe ende hat·
ſw̾ ſich mit ſtete an ir vnſtete lat·
wie vnſanfte dē ein ſcheiden tůt·
als es mir hat dc ſelbe getan·
liebe mv̊s dike mit leide zergan·
wie ſanft im iſt d̾ ſich hat behůt·
Nv w̾dent ǒgē vil truͤbe vn̄ rot·
nach liebē frúnde ſo lident ſi not·
die ir da beitēt lihte iem̾ me·
dc leit getůt manig̾ frowē nv we·
die froͤide enpflagē mit liebe alſ e·
d̾ wūne wendet nv manig̾ den tot·
mīne vn̄ frúnde ich dvr got laſſen wil·
des dunket mich dvr in niem̾ zevil·
ſit mā vns vō ime dieneſt gebot·
Min teil d̾ mīne dc ſvlt ir úch han·
dc en wil ich and̾s niemāne lan·
da bi ſvlt ir h̾re gedenkē min·
het ich iht lieb̾s dc ſolt úwer ſin·
froͤide vn̄ wūne w̾de vō ir ſchī·
ſi hat mir niwā leit noch getan·
ſit ich mich kerte vn̄ ie ſere rang·
an eine ſtat da mir leid̾ nie gelang·
bc dāne mir mvͤze es ǒch da mitte ergan·
Das ir genade mich ſo gar v̾gie·
des bī ich vꝛo vn̄ klagetez doch ie·
ir edeler mīne ich noh ſanfter enbir·
dāne ich ſi weſte in dē ſoꝛgē nach mir·
als ich nv hā vn̄ lide nach ir·
got vnſer h̾re dvr dē ich ſi lie·
d̾ gvnne mir des w̾de iemer ein wib·
d̾ vf genade dienē ſvle min lib·
dc es dv́ ſi dú mich erſte vie·