Dú werlt mit gruͤne wil zergan nv vil schiere·
es ist an den luten vil gros wunder geschehen·
froͤwent sich zwene so spottent ir viere·
weren si wise si moͤhten wol sehen·
dc ich dvr iamer die froͤide verbir·
nv sprechent genv̊ge war vmbe·
ich tvmbe·
niht singe den froͤide noch geswichet e dâne mir·
Dú werlt hat sich von froͤiden gescheiden·
das ir der vierde niht rehte tůt·
ivden vnd kristen inweis vmb die heiden·
die denkent al ze verre an dc gůt·
wie si es vil gewinnen doch wil ich in sagen·
es mvͤs alles hie beliben·
den wiben·
nv nieman dienet rehte als hoͤre ich si klagen·
Swer nv den wiben ir reht wil verswachen·
dem wil ich verteilen ir minne vnd ir grůs·
ich wil ir leides von herzen niemer gelachen·
swer nv welle der lasse oder tůs·
wan ist ir eine niht rehte gemv̊t·
da bi vinde ich schiere·
drie oder viere·
die zallen ziten sint húbesch vnd gv̊t·