Dort kvmt ein sinnelose samnvnge·
der sint wol zwelfe als ich iv die nv zelle·
her hebestrit von hohen vels der ivnge·
amerolt vnd Isink sin geselle·
Isater vnd engelwart der lange·
vte vnd otte vnd isenbart·
isenbolt vnd irrebart·
die irrent mich an minem anevange·
si ist mit lieber danne ich ir·
lieb ist dú liebe mir·
Si vragent wer si si dú selderiche·
der ich so hofeliche han gesvngen·
si wont in tútschen landen sicherliche·
dc sage ich den alten vnd den ivngen·
si ist in einem creisse der ich diene·
von dem pfade vf den sant
von elsâsse in vngerlant·
in der enge ich si vant·
si ist noch zwischen paris vnd wiene·
si ist mit lieber danne ich ir·
lieb ist dú liebe mir·
Ich weis einen der sich nv des vlîsset·
das er mich beswere an engelgarte
in weis niht wc er der lieben wîsset·
im geschiht liht als isenbarte·
den sin mv̊ter mit der pfannen schalke·
sere an sine stirnen slv̊g·
dc man in von dannen trůg·
des er selten ie gewůg·
da vor hvͤte sich der meiger valke·
Si ist mit lieber danne ich ir·
lieb ist dú liebe mir·