Do man sach·
meien dach·
bluͤte manger hande·
dc hat wandelvnge· siner liehten varwe genomen·
rifen gra·
sach ich da·
bestrout vf dem sande·
da gedahte ich winter kalt· nv wilt dv aber komen·
dv hast botten vúr gesant·
die han ich vil wol erkant· mich frúset·
wol im der den svmer ein vil reines wib erkúset·
dem mag si den winter lang an allen froͤiden frumen·
Reines wib·
svͤzer lib·
got dich hat geheret·
dv bist aller creatúre schonest angesiht·
an die fruht·
frowen zuht·
gottes gvͤte meret·
schoner bilde lieber schepfenvnge enweis ich niht·
ane gotes himel her·
vf der erde vnd in dem mer· in lúften·
so enkan sich nieman besser ǒgenweide gegúften·
reinú clarú svͤzú luter wib des man dir giht·
Wol in wol·
vreuden vol·
hat si got gegossen·
dem vil werden geben man dc reine svͤze wib·
vf hoher bas·
schanden has·
si hant sich beslossen·
mit ir blanken armen dc ir wol gestalter lib·
ist vor schanden gar behvͤt·
winter kalt sie lútzel gv̊t verirret·
von ir ivgende kraft· ir deke wilunt wart verirren·
si enlaz durh dc kalt niht ir zit vertrip·