Do dc liehte morgen rôt·
was dvrh den gruͤnen hag gedrungen·
vnd dú vogellîn svngen·
do rief ein wahter an der zinnen·
swer nach senelicher not·
An liebes herze lit betwungen·
dem si genv̊g gesvngen·
er wache vnd ile balde hinnen·
von liebe scheide er sich enzit·
dc dike leit dem frúnde git·
der im zelange bi gelit·
wil er niht von hinnen· balde keren·
so wil er verseren·
sin trut an eren vnd an sinnen·
Von der stimme ein frowe gv̊t·
begvnde iamer vnd truren·
in ir herze mvren·
si sprach zir frúnde vs rotem mvnde·
lieb getrúwes herzeblůt·
min trost ob allen nahgebvren·
froͤide mv̊s mir svren·
din scheiden seret mich zegrvnde·
dú minne ist wunderlich gemv̊t·
in úbel keret si dc gv̊t·
dc si zeliebe manigem tv̊t·
dc wirt an mir vil wol beweret·
mich hat dú sorge erveret·
nach froͤiden sweret mir dú stvnde·
Mit den worten vnd alsus·
zenander twungen sich mit leide·
dú gelieben beide·
der tac si not vnd angest lerte·
manigen herzesvͤssen kvs·
enpfiengens vf der minne weide·
dike an vnderscheide·
dar nah ir truren sich do merte·
der gast der gab den morgensegen·
lieb wart mit leide widerwegen·
ir hohgemvͤte wc gelegen·
zesorgen wart in der mv̊t gespannen·
froͤide in wart verbannen·
der ritter dannen trurig kerte·