Die verzagten aller gůter dinge·
wenent dc ich mit in si verzaget·
ich han trost dc mir noch froͤide bringe·
der ich minen kvmber han geklaget·
ob mir lieb von der geschiht·
so enrůch ich wes ein boͤser giht·
Nit den wil ich iemer gerne liden·
frowe da solt dv mir helfen zv̊·
dc si mich von schulden mvͤssen niden·
so dc min lib in herzeleide tů·
schaffe dc ich fro geste·
so ist mir wol vnd ist in iemer we·
Frúnden vnd frowen in einer wete·
wolte ich an iv einer gerne sehen·
ob es mir so rehte sanfte tete·
als mir min herze hat veriehen·
frúndinne dc ist svͤsses wort·
doh so túret frowe vnz an dc ort·
Frowe ich wil mit hohen lúten schallen·
werdent dú zwei wort mit willen mir·
so lâsse ich dir zwei von mir gevallen·
dc ein keiser kvme gebe mir·
frúnt vnd geselle dú sint beidiv din·
so si frúndin vnd frowe min·